គ្មាននរណាម្នាក់ប្រាថ្នាចង់ក្លាយជាអ្នកក្រទេ
ពោលគឺមិនថាក្មេងមិនថាចាស់
ក្លាយទៅជាបុគ្គលមានទ្រព្យសម្បត្តិច្រើន
គឺជាក្តីសុបិនដ៏ធំមួយ។ យ៉ាងណាក៏ដោយ
បើទោះបីជាមនុស្សម្នាក់ស្អប់ភាពក្រីក្រ
ហើយពេញចិត្តខ្លាំងចំពោះភាពជាអ្នកមានក្តី
តែបើពិនិត្យមើលស្ថានភាពជាក់ស្តែង អ្នកមានទ្រព្យសម្បត្តិច្រើន
គឺស្ថិតក្នុងភាគរយតិចតួចនៅឡើយ
ខណៈចំនួនអ្នកក្រវិញគឺមានច្រើននៅលើពិភពលោកនេះ។
តើមានមូលហេតុអ្វី ដែលធ្វើឲ្យអ្នកមិនអាចក្លាយទៅជាអ្នកមានបាន?
ខាងក្រោមនេះ គឺជាទម្លាប់មិនល្អមួយចំនួនដែលរារាំងមនុស្សមិនឲ្យក្លាយទៅជាអ្នកមាននៅពេលអនាគត មានដូចជា៖
១) ចូលចិត្តចាយច្រើន
នាពេលបច្ចុប្បន្ននេះ មនុស្សភាគច្រើន
តែងនិយមប្រើប្រាស់សំភារៈទំនើបៗ ដែលមានតម្លៃថ្លៃៗ។
សម្រាប់អ្នកដែលមានលទ្ធភាពគ្រប់គ្រាន់គឺ អ្វីៗគ្មានបញ្ហានោះទេ។
បញ្ហាគឺសម្រាប់អ្នកមិនសូវមានលទ្ធភាព
ព្រោះពួកគេភាគច្រើនព្យាយាមប្រើប្រាស់របស់ទាំងនោះ
បើទោះជាខ្លួនមិនមានលទ្ធភាពគ្រប់គ្រាន់ក៏ដោយ តែឲ្យតែបានប្រើ
បើទោះបីជាត្រូវលក់អ្វីៗផ្សេងៗ គឺត្រូវតែទិញទាល់តែបាន។
ប្រការនេះ ធ្វើឲ្យមនុស្សភាគច្រើនមិនអាច
មានប្រាក់គ្រប់គ្រាន់សម្រាប់អនាគតនោះទេ
ព្រោះមិនអាចសន្សំប្រាក់សម្រាប់ពេលចាំបាច់បានឡើយ។
២) មានបំណុលច្រើនពេក
ការជំពាក់ធនាគារ ឬ នរណាម្នាក់ គឺជារឿងជៀសមិនផុត
ទាំងក្នុងជីវិតឯកជនធម្មតា និង ក្នុងពេលធ្វើអាជីវកម្ម។
តែអ្វីដែលជាបញ្ហានោះនៅត្រង់ថា ការខ្ចីលុយនោះ
គឺធ្វើឡើងក្នុងន័យអ្វី ហើយមានផែនការច្បាស់លាស់
ក្នុងការសង់វិញដែរឬទេ។ អ្នកខ្លះខ្ចីលុយគេដើម្បី
ពង្រឹងជំនួញរបស់ខ្លួន ឲ្យកាន់តែរឹងមាំ
ប៉ុន្តែអ្នកខ្លះទៀតបានជំពាក់លុយគេជាច្រើន
ដោយសារតែការលេងល្បែងស៊ីសងផ្សេងៗ។
ប្រសិនបើអ្នកជំពាក់បំណុលកាន់តែច្រើនទៅៗ ហើយគ្មានវិធីច្បាស់លាស់
ក្នុងការសងវិញទេនោះ មានន័យថា
អ្នកនឹងគ្មានថ្ងៃក្លាយទៅជាអ្នកមានបានទេ
ព្រោះលុយដែលព្យាយាមរកបាន គឺសម្រាប់តែដោះបំណុលប៉ុណ្ណោះ។
៣) គ្មានផែនការច្បាស់លាស់
ផែនការពិតជាមានសារៈសំខាន់ខ្លាំងណាស់
ដើម្បីតម្រង់ទិសដៅលើផ្លូវដែលត្រូវដើរ និង
សម្រាប់ដោះស្រាយរាល់បញ្ហាដែលកើតមាន។ មានន័យថា បើមានផែនការ
គឺស្មើនឹងមានគោលដៅរួចទៅហើយ
ថាតើត្រូវធ្វើយ៉ាងម៉េចដើម្បីក្លាយទៅជាអ្នកមាន? ដូច្នេះ
ការដើរទៅរកគោលដៅគឺជារឿងបន្ទាប់។
ប៉ុន្តែប្រសិនបើអ្នកគ្មានផែនការច្បាស់លាស់
ក្នុងការធ្វើអ្វីមួយទេនោះ ភាពបរាជ័យ នឹងកើតឡើងជាមិនខាន។
៤) គ្មានសេចក្តីព្យាយាម
សេចក្តីព្យាយាមគឺ ជារឿងដែលមិនអាចខ្វះបានសម្រាប់ជីវិតមនុស្ស។
មនុស្សភាគច្រើនមិនទទួលជោគជ័យ គឺមិនមែនដោយសារតែពួកគេ ល្ងង់ ឬ
អសមត្ថភាពក្នុងការធ្វើរឿងអ្វីមួយទេ តែអ្វីដែលសំខាន់គឺ
មកពីខ្វះការតស៊ូ។ គ្មានរឿងអស្ចារ្យណាមួយកើតឡើងដោយ ងាយៗនោះទេ
ពោលគឺអ្វីៗត្រូវចំណាយពេល និង ប្រើប្រាស់ធនធាន
ក៏ដូចជាការអត់ធ្មត់ច្រើនទើបអាចសម្រេចបាន។ តែយ៉ាងណាក៏ដោយ
នៅពេលជួបបញ្ហាម្តងៗ មនុស្សភាគច្រើនតែងតែបោះបង់
ដូច្នេះភាពជោគជ័យមិនអាចកើតមានឡើយ។ ក្នុងន័យនេះ អាចនិយាយបានថា
បើសិនជាអ្នកមិនព្យាយាមធ្វើអ្វីដែលអ្នកគិតថា មានប្រយោជន៍ ឬ
ជាផ្លូវដែលធ្វើឲ្យជោគជ័យនោះទេ
អ្នកពិតជាមិនអាចមានឱកាសក្លាយទៅជាអ្នកមានបានឡើយ។
៥) ចូលចិត្តពឹងផ្អែកលើអ្នកដទៃខ្លាំងពេក
ការពឹងពាក់អ្នកដទៃ គឺ
ជារឿងធម្មតាសម្រាប់ជីវិតប្រចាំថ្ងៃរបស់មនុស្សគ្រប់រូប
ព្រោះមនុស្សម្នាក់មិនអាចធ្វើអ្វីៗគ្រប់បែបយ៉ាងទេ
ដូច្នេះត្រូវការជួយគ្នាទៅវិញទៅមក។ ប៉ុន្តែមិនមែនមានន័យថា
រាល់ពេលដែលអ្នកពឹងអ្នកដទៃគឺជារឿងត្រឹមត្រូវឡើយ
ព្រោះវាអាចទៅជាទម្លាប់មិនល្អមួយ
ក្នុងការមិនព្យាយាមបញ្ចេញសមត្ថភាពឲ្យអស់
ហើយបែរជាពឹងអ្នកផ្សេងឲ្យជួយទៅវិញ។
នៅពេលដែលអ្នកមិនធ្វើរឿងអ្វីមួយឲ្យអស់ពីលទ្ធភាពទេនោះ
អ្នកនឹងមិនអាចឈោងចាប់យកភាពជោគជ័យបាននោះទេ
ជាពិសេសនៅថ្ងៃមួយដែលគ្មានអ្នកជួយ។ ដូច្នេះ
គួរធ្វើកិច្ចការឲ្យអស់ពីកម្លាំងកាយ និង កម្លាំងចិត្តសិន
មុនពេលដែលអ្នកសម្រេចថា ពឹងអ្នកដទៃឲ្យជួយ។
៦) គ្មានមហិច្ឆតា
មហិច្ឆតា គឺជា ចំណុចដ៏សំខាន់របស់មនុស្សក្នុងការសម្រេចអ្វីមួយ
តែបើគ្មានមហិច្ឆតាទេ មនុស្សភាគច្រើនមិនសូវគិតចង់ធ្វើអ្វីឡើយ
ហើយបើទោះបីជាធ្វើ ក៏វាមិនមានភាពអស្ចារ្យអ្វីដែរ។ ជាក់ស្តែងណាស់
បើកាលណាគេមានមហិច្ឆតាចង់ក្លាយទៅជាអ្នកមានហើយ
គេនឹងស្វែងរកវិធីគ្រប់បែបយ៉ាងដើម្បី សម្រេចគោលដៅរបស់ខ្លួន
បើទោះបីជាមានការលំបាក និង ត្រូវចំណាយពេលវេលាយូរយ៉ាងណាក្តី។
៧) គ្មានជំហរច្បាស់លាស់
បើអ្នកមិនមានគោលជំហរច្បាស់លាស់ ក្នុងការធ្វើការងារអ្វីមួយទេ
វានឹងធ្វើឲ្យមានការផ្លាស់ប្តូរជាញឹកញាប់
ដែលធ្វើឲ្យខាត់ពេលវេលា។ នៅពេលដែលគ្មានគោលជំហរច្បាស់លាស់
វាប្រាកដណាស់ថា អ្នកនឹងមិនអាចមានឥទ្ធិពលលើអ្នកដទៃទេ
តែគឺជាអ្នកទទួលឥទ្ធិពលពីអ្នកដទៃទៅវិញ។ មិនមែនមានន័យថា
អ្នកត្រូវតែឈរលើគោលការរបស់ខ្លួនរហូតទេ
ពោលគឺត្រូវស្តាប់អ្នកដទៃខ្លះផងដែរ
តែត្រូវតែសម្រេចចិត្តរាល់ការងារអ្វីៗដែលថ្លឹងថ្លែងឃើញថា
ពិតជាត្រឹមត្រូវ ហើយវានឹងជោគជ័យ៕
ប្រែសម្រួល៖ រស្មី
